د ترانسپورت او ملکی هوایي چلند وزارت
خبرونه

پیژندنه

دحمد حمید طهماسی د ترانسپورت وزارت سرپرست ژوند لیک

محمد حمید طهماسي په ۱۳۵۸ کال د غزني په ولایت کې زېږېدلی او د افغانستان د اوسني او مخکني حکومت د زیاتو چارواکو برخلاف، سیاست یې له خپل پلار او کورنۍ څخه په ارث ندی وړی. اوس وخت کې هم د ډېر شمېر خلکو د تصور خلاف، له سیاست کولو سره علاقه نه لري. خو دا چې د نوموړي پلار ارواښاد حاجي مدیر جمعه خان طهماسي د حکومت د منځنۍ کچې یو له پیاوړو مدیران څخه و، نو د هغه حرفوي او تخنیکي لیدلوری ددې لامل شو، چې د سیاست پر ځای دا لیدلوری خپلو ماشومانو ته هم ور انتقال کړي. نو همدا لامل دی چې نوموړي دا مهال چې د خپل عمر درېیمه لسیزه تېروي، په هېڅ کوم حزب کې غړیتوب نه دی اخیستی. 

کورني جګړې دود او لوخړې نه یوازې دا چې په کورنۍ کې د زده کړې د بهیر د په ټپه درېدو لامل نشوې، بلکې د پلار په مرسته، د ښوونې او روزنې انګیزه د کورنۍ د ټولو غړو په وجود کې لا پسې را ژوندۍ شوه. په رنګین فرهنګي چاپېریال کې ژوند کول، ددې لامل شو چې د زده کړو تر څنګ، د هېواد د نورو ملیتونو سره خپل تعامل پیاوړی او له ماشومتوبه د لویو کارونو لپاره تیاری ونیسي. د تنظیمي او قومي جګړو په ترڅ کې، چې په لویه کې یې موخه جګړې ته د ځوانانو ترغیب و، حمید طهماسی یو له هغو ځوانانو و، چې په هغه وخت کې متفاوت مسیر انتخاب کړ. او په دې سره یې وکولای شول، چې خپلې لومړنۍ او منځنۍ زده کړې په خپل زېږنځی کې بشپړې او د لوړو زده کړو لپاره یې نوې لاره پرانېسته.  

د کابل پوهنتون د حقوقو فاکولته کې شامېلېدلو، هغه ته د حقوقي علومو د زده کړې لپاره یوه بله کړکۍ برانېستله.

پوهنتون کې یې د ځان لپاره ښه دوستان وټاکل، چې تر اوسه پورې په اړونده چارو کې، د ګټورو مشورو له لارې هغه ته اوږه ورکوي. په وار وار یې د بېلابېلو غونډو په ترڅ کې کې د پوهنتون دورې له ټولګیوالو څخه مشورې اخیستي او د هغو غوره یې عملي کړي دي. په خصوصي ناستو کې یې تل له خپل ټولګیوالو او همکارانو څخه یې د واقعي پانګې او برې د کلۍ په توګه، یادونه کړې. دا تعامل ددې لامل شوی چې د عصر له نویو نظریو سره مینه پیدا او د ښې حکومتوالۍ د پایو د ټینګښت په برخه کې د ځوانانو له مشورو څخه ګټه واخلي. په ۱۳۸۵ کال کې له پوهنتون څخه فارغېدل یې هم مهاله ؤ هیواد ته د داسط نوې فضا له راتللو سره، چې  د نړېوالو موسسو په شمول، ګڼ شمېر آدرسونو کې ځوانانو ته د خدمت کولو فرصتونه برابر شول. 

محمد حمید طهماسي له ګڼ شمېر نورو ځوانانو سره لویې څارنوالۍ په اداره کې د څارنوال په توګه کار پیل کړ. د څارنوالۍ دندې طهماسي د افغانستان د عدلي سیستم د قوت او کمزوریو له ټکو سره بلد کړ او دا پوهه او تجربه یې د لا ودې  لپاره بنسټ وګرځېد.